Bases de participación

DESCRICIÓN

O desafío organízase dentro das actividades relativas á celebración da Galiciencia 2026, promovida por Parque Tecnolóxico de Galicia S.A. en colaboración coa Consellería de Economía, Industria e Innovación. Este ano a temática elixida para a celebración da Galiciencia é a Ciberseguridade, polo que os diferentes retos estarán relacionados coa dita temática, a súa repercusión a nivel social e avances e posible progresión.

O desafío constará de dúas fases:

• 1ª Fase non presencial: constará de tres retos a realizar en liña que se remitirán a través da sección da web correspondente a cada un dos retos (sempre dentro do sitio atrevete.galiciencia.com). Para poder superar esta primeira fase, é preciso participar na totalidade de retos. Non son excluíntes entre eles (non hai eliminados nin puntuacións mínimas para superalos), pero si é requisito indispensable participar nos tres retos iniciais dentro dos prazos marcados para cada reto.

• 2ª Fase presencial: constará dun reto final que terá lugar o xoves 14 de maio de 11:00h a 12:00h no Parque Tecnolóxico de Galicia (por concretar o lugar exacto) durante a celebración de Galiciencia, e na que participarán os tres grupos mellor valorados de cada categoría na anterior fase. Esta decisión tomarase en conxunto coa visión e puntuación dos tres retos. Os criterios de valoración indicaranse na información e instrucións relativas a cada reto.

PARTICIPANTES

O desafío está aberto a todos os estudantes de entre 10 e 18 anos, establecéndose tres categorías:

• Categoría A (4º, 5º e 6º de EP)
• Categoría B (1º, 2º e 3º da ESO)
• Categoría C (4º da ESO e Bacharelato)

Os estudantes participarán en grupos de máximo tres alumnos/as por grupo, intentando que sexa sempre mixto, e non existe a posibilidade de participar de modo individual.

CONDICIÓNS E FORMATOS

As condicións e formatos de cada proba faranse públicas na web do desafío (atrevete.galiciencia.com) no momento da liberación progresiva de cada reto.

INSCRICIÓN E PRESENTACIÓN DOS RETOS

Todos os participantes que desexen tomar parte neste desafío deberán cubrir o formulario previo a resolver o primeiro reto cos seus datos de contacto (especificados a continuación). Posteriormente, reenviaráselles un e-mail desde o enderezo oficial do desafío (atrevete@galiciencia.com) coa xustificación de participación. No formulario de inscrición, deberán completar os seguintes datos de identificación:

• Nome do grupo
• Nome e apelidos dos integrantes
• Curso académico
• Nome e e-mail do centro ao que pertencen
• Nome e apelidos, e-mail e teléfono do docente/titor/a do grupo

Só se permite unha única inscrición por equipo, e un/ha mesmo/a participante non pode pertencer a varios equipos.

O cubrir correctamente o formulario de inscrición no prazo establecido fai efectiva a inscrición no desafío. Recibiredes un correo confirmando a inscrición e a información do primeiro reto. Non se publicarán as puntuacións de todos os equipos, pero si se poderán dar e publicar recoñecementos especiais a equipos que destaquen nalgún ámbito en particular.

A información e respostas dos seguintes dous retos serán remitidas así mesmo desde os espazos dispoñibles nas correspondentes seccións da páxina web (sempre dentro do sitio atrevete.galiciencia.com).

De aparecer calquera incidencia técnica ou dificultade na remisión dos retos, os participantes terán dispoñible o enderezo de correo electrónico atrevete@galiciencia.com para resolvela.

XURADO

O xurado será asignado pola organización entre persoas expertas na materia.

RESOLUCIÓN

A resolución do xurado en relación coa primeira fase farase pública nun prazo máximo de dúas semanas, unha vez finalizado o prazo límite para a entrega do último reto.

Para a selección de clasificados, observarase o desempeño dos participantes en relación coas clasificacións da plataforma para cada un dos retos, seleccionado aos dous primeiros equipos en ranking por puntos e ao mellor (ou seguinte mellor, en caso de coincidir) no ranking de experiencia de aprendizaxe. O xurado resérvase o dereito de aplicar excepcións a este criterio en función da evolución dos equipos.

A resolución do xurado en relación coa segunda fase farase pública o día 14 de maio de 2026 durante a entrega de diplomas da final presencial do desafío científico.

A resolución do concurso é inapelable.

PREMIO

Os grupos finalistas da primeira fase e, por tanto, participantes na fase final, recibirán un diploma e un obsequio pola súa participación.

Os grupos ganadores do reto final recibirán un diploma e un premio.

PROPIEDADE

Todos os traballos presentados quedarán en propiedade do PARQUE TECNOLÓXICO DE GALICIA S.A., quen se reserva o dereito da súa exposición, reprodución ou publicación, sen que isto supoña perda da autoría dos traballos, cedendo os dereitos de reprodución, exposición e explotación non remunerada, pasando a incrementar o patrimonio cultural, sen que estes poidan ser obxecto de compravenda.

OBSERVACIÓNS

• O feito de participar no presente desafío implica a aceptación total das bases.
• A organización non se responsabilizará da non chegada dos retos ao seu destino.
• Os retos que non cumpran as condicións de presentación non entrarán en concurso.
• A organización resérvase o dereito de tomar decisións non reflectidas nas bases, así como solucionar calquera tipo de conflito na interpretación destas.

• Tecnópole garante o correcto tratamento dos datos de acordo co RXPD (Regulamento Xeral de Protección de Datos) e a lexislación española vixente. PARQUE TECNOLÓXICO DE GALICIA, S.A., como responsable, fará uso da información persoal, coa finalidade de posibilitar a súa participación no desafío da Galiciencia 2026, sendo a base xurídica a prestación do servizo. Poñemos todo o coidado e contamos coas medidas que a lei esixe para que a información persoal facilitada e/ou o resultado do seu tratamento non chegue a terceiros, salvo imposición legal, encargados de tratamento ou logo do seu consentimento. Teñen dereito a exercitar os dereitos de acceso, rectificación, cancelación, supresión, limitación e oposición, así como a solicitar a súa portabilidade, determinados pola lexislación vixente en materia de protección de datos persoais, dirixíndose por escrito ao seguinte enderezo: Parque Tecnolóxico de Galicia S.A. Edif. CEI, San Cibrao das Viñas, 32900 Ourense. O en el e-mail: dpo@tecnopole.gal

REALIZACIÓN E MANIPULACIÓN

Os retos deben ser realizados polos integrantes de cada grupo participante, polo que calquera dúbida na confirmación ou autenticidade na autoría destes será motivo da non participación no desafío.

A organización resérvase o dereito de restrinxir a participación dalgún equipo en caso de sospeitar malas prácticas ou condutas inadecuadas.